didto sa unahan

wala na akoy
pangitaon pa
dili sa ingon 
nga nakaplagan
ko na ang tanang
nawal, wala na
akoy angay pang
pangayoon, ulan
og init nabati ko
na, baha og hulaw
nalabyan ko na.

wala na sad koy
paaboton pa, busa
unsa pa man kahay
pulos ning kinabuhi?

ang kamatayon
atong higala og
kon moabot kini
sa walay pangutana
kuyugan tang
duha.

ayaw pagtanga
ayaw padala sa
ilang mga sulti
nga walay tawo
ang pikas lawak

ayaw kabalaka
dili kini ang lugar
alang kanato
ang mga buwak
dinhi
layo rang kahumot
didto.

wala kitay mga
mata apan
mas makakita
wala kitay
kamot apan
mas makahawid
wala kitay panit
apan mas
makabati
wala kitay dalunggan
apan mas
makadungog
wala na kitay
kasingkasing
apan mas dulot
ang gugma
didto