confessional poetry

ang love life
dapat permanenteng
closed

not for public
consumption

kana bang intimacy
nga alang lang sa
duha ka tawo
nga kunuhay nahubog
sa kataas ug
alcoholic content
sa gugma.

always tak-om ang baba
sarado sa mga
sekreto nga dili ibutang
sa kategoryang
kiss and tell.

mao man god kini
ang exciting issue

ang naghatag ug meaning
sa life, 
ang nakapakilig
sa boring existence
nga gilikosan sa
bitin nga
angst

nga kon buot tugkaron
kining atabay sa dugos
sa gugma
didtos tuburan nga
batong siak
napuno na sa ulat sa gugma
sa bantok nga kasingkasing nga
siging kasamdan

sa mga tuhod nga nakaluhod
sa kahapdos
apan mitindog lang gihapon

sa sakit nga mga piang sa tiil
nga mibarog lang gihapon

sa mga putol nga gisumpay
sa mga bali nga gihilothilot
diha sa ayom-ayom
aron maalim 

ayaw gayod
panugilon kay kon kini
imong buhaton
sama ra sa giguba mo
ang bongbong
sa balay nga haruhay

sama ra sa gibuslotan
mo ang baroto nga
atong gisakyan
unya anaa kita sa lawod
sa mga saad
sa mga balod sa pasalig
nga kon mangalunod tang
duha
dili na ta kamaong molangoy

malumos sa lawod nga
dili na nato matugkad
wala na kanato ang
kumbate heneral kay
nagpabilin man kita
sa kinawat kawat nga
brotsa kriminal


nindot ang kahilom
mautganon
lami ang mga tak-om
kay kini
makabusog
makahimsog sa lawas
nga nag-agulo sa 
kawad-on 
makalipay sa kalag
nga nawad-an na sa
dan-ag diha sa
usa ka balaanong
tawhanong kaulag.