2019/07/09

kabahin ni Atty. P.

kini hinoon siya
sa akong paghusga
gikan pa sa una
nakong paghimamat
kaniya
mao ang tawong kon
asa ang daghang
kwarta pwes didto
na dayon siya

morag hulmigas nga
kon asa ang nahulog
nga asukar
o ang mumho ba kaha
atua kini
nanagtapok

nangutana ko kausa
kon asa na siya nga dugay
naman nako siyang
wala igkita

nakahisgot pa man
gani ko sa lain
nakong amigo
nga nangutana kon
asa na ni siay kay 
dugay na man lagi
nga wala na siya
namo nakita
 nga basin
nagtagotago na siya
sama sa usa ka patyonon
sa among balangay
kay ubayubay na baya
usab ang
gipamatay diring dapita
tungod sa 
pagkabadlongon o
pamintaha sa
isigkaingon

mitubag siya
nga miadto siya sa israel
sa usa ka gikinahanglan
niyang pilgrimage isip
usa ka buotan nga kristyano

gani miadto man gayod
kuno  siya
sa suba diin gibunyagan
si kristo
unya naligo siya didto
(aron kaha paghugas sa
iyang daghan kaayong
mga sala o kalapasan?)


dili lang kana

milapos siya didto sa
atabay diin gipainom 
si moses
(aron ba kaha mahupay
ang kauhaw sa 
iyang kalag, kana kon
anaa pa ba siya
niini
o konsyensa ba kaha
nga gipakisama
natong kalag
o psyche)


ako usab walay diki
diki, sa pagkomento,

nga  adunay
gitago nga dakong kasuko kaniya
mitubag

"ah maayo, 
basin kana maoy  makalimpyo
kanimo" 

unya sa dihang
hapit na kami magbulag
sa among mga lakaw, nakabungat
kog dili maayo, 

" ah, dili ba si
Atty. M. naligo man sab didto,
apan, naunsa ba nga
sa miaging bulan
napusilan man kini ug 
dayog deretsog kamatay
ug wala naman gani
nakaabot sa kinadul-ang
ospital?"

"dead on arrival"

baya, maoy akong
hinapos nga
estorya kanina

kahinumdom  hinoon ko
ni Atty. M. nga sa dihang
gidala kini sa hospital
walay miduol nga silingan
unya ang iyang "boy"
giputos man lamang siya
ug dahon sa saging
nga naligo sa iyang
kaugalingong dugo
unya guba kaayo ang
nawong nga maayong
pagkaigo sa
baby armalite, kay lagi
human natikalbong
sa igo sa sniper
giduol pa gayod siya
gipunting ang ulo
ug girakrakan
aron siguro gayod
nga ang sama kaniya
dili na mabuhi
o molungtad sa
katilingban nga hagbay
ra niyang gihulga
ug giilad

hmm, kini si atty. P
( nga maoy akong
gihisgotan karon)
 baga kaayo ang iyang
nawong, dili makita ang
iyang mata sa heavy nga 
tint sa iyang mahalon nga
sunglasses, 
mipahiyom lamang
sama sa usa ka kuripot nga
killer
dayog pasirit kusog sa iyang bag-ong
isuzu Mux nga 4-wheel drive.
palayo kanako

nga bisan ug wala na
siya
gibati ko pa gihapon
ang kapungot
sa ngil-ad nga abog
nga milanding
sa akong 
aping.

No comments :

Post a Comment

Nindot ba? Unsay imong maikasulti?

Panginhas dire