ang akong ugangan
manggihatagon baya
sa iyang dako nga
lamesa anaa gihukad ang
daghang makaon ug mainom
lechon, pilit nga kan-on
humba, adobo, sinugbang
atay, bingka, puto,
ug uban uban pa
malipayon kami sa
talad-kan-anan unya
human sa pagpangadye
misulay na unta kami
ug hiwa sa pagudpod nga
panit sa lecho
ang uban misulay na
pagbuak sa dagkong mga
kasag
nga namulapula sa
kalamian
naundang ang tanan
human niya kami gipasidunggan
isip mga dinapit
nga kining tanan mahimo
nga kan-on ug subaron kon
mamatay na kuno siya
ang mga gutom nga dinapit
nangahilom
apan dunay usa ka bagis nga
dinapit
nga nagkuha sa hait nga
kutsilyo
unsa ang sunod nga
nahitabo? dili ko na kini
masulti kaninyo
nangabusog ang tanan
nangalipay
tungod sa gibuhat sa
maong bagis nga dinapit
pagkabuotan sa maong
dinapit
giwagtang niya ang among
mga kasakit
No comments :
Post a Comment
Lami ba?