2015/09/20

balak alang sa akong panahon

kita nga nagtoo nga kita maalamon

misulat nga ang mga langgam

apil na ang mga aliwang

og ang mga wati nga wa pa kapirma sa nagtinga nga 

tiguwang sa iyang lawak pahulayan

mga walay kahim-agan

mga walay hunahuna kon unsa ang dangatan sa ugma

sila nga nagsalig sa ilang mga pako lamang

sa ilang mga paak og sa ilang mga kadanlog og kalipay diha sa

ilalom sa kangitngit

kita nga hinungaw lamang sa hulaw sa usa ka hamubo nga panahon

nganong nagpakaaron-aron diha sa 

mga dili kunuhay matapos

sa mga gihandom ta nga molungtad

ikaw sa imong mga anak

siya sa iyang mga kabtangan

sila sa ilang mga katigayonan

siya sa iyang kagamhanan

siya sa iyang pagkasipat

silang tanan sa ilang kalaagan


napuno na ang banga

miawas na ang tubig og nabasa na ang yuta

nga misurop paingon sa kataposang

pagkawala.

Panginhas dire