2015/09/20

tugon sa usa ka bana ngadto sa iyang byuda

adunay wala nako masugid kanimo

dili tungod sa wala akoy pulong alang niini

aduna akoy gustong isugilon kanimo apan dili gayod mabungat sa akong baba

mikagot ang akong mga ngipon

nanirado ang akong apapangig diha sa kangilngig sa ako untang angayan isugid kanimo

apan hangtod karon dili ko gayod kini masugilon kanimo

kon isugilon ko kini adunay mabugto nga tanod nga sumpay sa atong duha ka pusod

adunay malakra nga mantsa sa imong bra nga dili na matangtang sa sabon og suka

dili ko gayod kini masugilon pa kini kanimo

dalhon ko kini sa akong lubnganan

og samtang ikaw mohilak og mag-atong usa ka hapon niana sa akong lubnganan

ikaw ang mosigulon bahin niini kanako

nianang higayona handoma nga ako mamati kanimo

og magpasalamat nga ikaw bisan unsa pa ako

misabot gayod kanako.

Panginhas dire