kabahin sa tiguwang nga babayeng naghatag kuno og kasakit sa kadaghanan

kini si marjorie
tiguwang na sa iyang edad
kumpas sa iyang
pagkasapoton og pagkawala
na gayoy pagsabot sa kalihokan
sa iyang palibot,

dako na kaayo siyag kulang sa
pagpaubos,
miawas na ang iyang pailob
 
wala na kaniya ang pagsabot sa
mga batang wala pa intawoy
buot,

sa akong paglantaw kaniya
misamot na og kadako ang iyang
alom nga subay sa linya sa iyang
aping dapit sa iyang ilong nga
kanunayng agianan sa
mga lusok sa luha,

ang iyang buhok bisan og dili
pa niya kini isulti,
nagkanunay na og pangahulog
og akong matantiya
nga matag buntag sa iyang
pagmata
nagtapok ang daghang buhok
nga nabiyaan sa iyang
alugnan,

misamot og kakunot ang iyang
agtang
alayon sa mga kunot nga
makita na kaayo diha sa iyang
kamot og mga tudlo,

daghang nag-ingon nga sa iyang
pagkainsultador
unta angayan na siyang badlongon
og kasab-an

apan dili ko gayod kana mabuhat,
dako ang akong panglantaw kaniya
gani taas kini sama sa mga layog na
kaayong lubi didto sa baybayon,

dako ang akong mga pangandoy nga
unta puhon sa iyang pagpahulay sa dayon
balonon niya ang

pangalimyon sa usa ka tam-is nga pahiyom