2015/09/03

wala na ako'y
ikasulti pa bahin kanimo

ang imong ngalan
akong gitulon isip usa
ka kahilom

sa una
kanunay akong matuk-an
kanimo

gisuka ko ang hangin
kapila ba ako nga gibutdan
og tiyan
sa paglitok lamang sa
imong ngalan?

dili ko ikalimod nga
ikaw ang akong sinaligan
sa pipila ka tuig
sa akong panaw

salamat, salamat
ning akong paglawig 
kita lang gihapon ang
magkuyog

wala na ako'y gisaligan
wala na ako'y kapaingnan

kinsa ka ba? asa ka ba
gayod nako makita?

wala ako makaila kanimo
wala ako sukad makakita kanimo

apan nganong ania ka man
kanako?
nganong nakigsulti man
ako kanimo?

pasayloa kini akong mga
pagduda
kaadlawon pa karon
anaa pa ang mga damgo

ania ako nagtukaw
naghandom

namasin nga basin 
mahinumduman mo ako
og imo na akong
kuyugon

Panginhas dire