ako dakong mapasalamaton
sa akong gibating kahadlok, sa dihang
miduol ka kanako ug unta ako nakahukom na
nga mokuyog sa baho sa imong gininhawa
midulot sa akong panit ang kabugnaw, nga
mora akog gihagwa sa usa ka kalag sa usa
ka patay nga sa buhi pa kini
sarang gayod makapangasaba kanako,

pagkainit sa imong paghawid
midulot kini sa akong bukog isip
sugnod sa akong kaulag
nga diha dayon gidauban mo ang
mga sagbot nga nagtabon sa akong
kasingkasing

misaad ako kang Nanay
nga pagkahuman sa adlaw ako gayod
mopauli dayon sa way paghapithapit sa
kabayabasan kay lagi
ang buotang bata mopauli man gayod
deretso sa panimalay aron
lawgan ang gipanggutom na nga
mga baboy

kalami na gayod unta sa akong pagbayaw
apan dako, balikon ko, ang akong pagpasalamat
sa akong kahadlok

wala madayon ang imong katawa
wala mo mabuntog ang akong kakapoy
sa dihang hapit na mahitabo ang dili unta
angay
gilalis ko ang akong kaugalingon
giingnan ko siya sa walay pagdikidiki
"usa ka man diay usab sa mga mobudhi
kanako, ug busa gikan karon dili ko na 
usab ikaw saligan"