2015/11/14

terorismo sa Paris

tan-awa 
kadtong gipakaon mos imong
palad
karon mipahit naman sa imong
bukton

ang mga itoy nahimong

mga leon
ang mga tamsi nahimong
mga agila
ang mga ulod nahimong
mga kobra

unta kon unsa ang Syria
sa iyang kasagbot gipasagdan
na lang kining
molabong sa pagkaiya

unta ikaw nga gamhanan
nagpabilin na lang unta diha sa
imong trono

kan-a ang imong pamahaw
imna ang imong bino
ug kon ablihan mo man ang
imong bentana 
lantawa lamang ang kalibotan

ayaw hilabti ang mga alibangbang
ayaw kutloa ang mga buwak
ayaw tudloi ang bulan ni ang adlaw
kon unsay angay nga buhaton

daghan karon ang gipamatay
daghan ang mangiyak
daghan ang magdumot nganong
namugna ang gahom
ang kahakog og ang 
pagpanghilabot sa tanang
dunay unod og mga bukog

Panginhas dire