2015/11/04

kon molarga na gani ka sa halayong dapit
tabok sa lawod lapas sa mga isla
ang mga mitagbo kanimo nga hangin
nanghimolbol sa imong buhok maong
mabati nimo nga morag nagkagaan ang
imong ulo, 

moingon ka nga ang mga abog nangapalid
na 
pinaagi niining hitaboa mabati mo usab
nga ikaw nalimpyo gamay
pinaagi diha sa pagpanaw

pareho adtong imong gibati sa bata ka
pa nga sigi kang panghugas sa imong kamot
unya nangumpisal ka sa pari sa inyong
eskwelahan 

miingon ka nga ang imong mga sala gikuha sa
pari og iya kining gipapalid sa hangin
maong nawala na kini

inig abot nimo sa imong padulngan bisan gani
og wala pa mahuman ang mga katuyoan kon aduna
man ugaling

magpaspas ka na usab og pamotos aron mobalik
sa imong agi
hangtod nga moabot ka sa imong panimalay
sa adlaw nga domingo

lahi na ang plastada sa imong kinabuhi
andam ka na usab nga molupad
ang imong mga pako gibatig kalig-on
ang imong mga kuko misamot ka hait

og didto sa kalangitan sa imong mga pangandoy
molantaw ka sa ubos sa patag
og miingon, " mingaw man gihapon....."

Panginhas dire