mikaging kini sa usa ka pahina

kasagaran kanato
nagpuyo lamang
nagpaanod sa sulog
sa kinabuhi
og andam na kon
asa kita dalhon

kasagaran kanato
mitoo sa mga gisulat
nang daan 
sa libro sa kinabuhi

anaa pa ba kahay
mausob sa dagan
sa atong mga pagtoo?

ang paglaom kanunay
nga nagpaibog sa iyang
mga saad

ang mga panghitabo
sa matag adlaw
morag imong kaaway
nga miingon
"gibinuangan ka lang!"

didto sa gamay suok
sa imong kalibotan
giuntingkay mo ang
layang buwak nga
nagpabiling timailhan
sa imong kasakit

mikaging kini sa usa
ka pahina
nga gituok sa laing
pahina
sa librong karaan
nga hagbay rang
nahuman