gilabyan ko na lang, gibalibaran

karon morag nasabtan ko na
nganong kinahanglan nga sa kanunay
ibutang sa alimpatakan ang
pagkalumalabay sa mga butang

sama sa mga butang nga hinimo sa
Tsina, ang yabe nga dili maabre og
dili sab masira, ang tualya nga dili
kasuyop og tubig, ang gatas nga
nakapatay sa masuso ni Celing,
ang pusil nga wala ka boto, ang
sardinas nga makalanag, nga apasumpay
sa mga walay pulos,
anaa usab ang mga pinugos,
ang mga makahadlok, ang mga peke
apan atua, nagpasad lang gihapon sa
merkado, unya pagkadaghan lang gihapon
sa mamalit

kadtong christmas tree nga nasunog og
nakasunog sa balay ni Lagring,
natintal ka man god sa  pagkabarato
sa mga dinaghan apan makadaot,

karon natalimad-an ko na ang kalipay
diha sa mga lumalabay nga dili na nako
dawaton bisan unsa pa kaanindot

sa kanunay gibutang ko sa akong dughan
ang panaw, ang panan-aw nga kita milabay
lamang dinhi, nailad, natagam, og sa wala
nay lingi-lingi sa mga nagpahiyom og
sa mga nag-atang aron dalitan kita sa mainom
og makaon, sa usa ka balay pahulayan,
sa usa ka sapa nga kaligoan, sa baybayon nga
putig balas unya tin-aw ang dagat,

gilabyan ko na lang, gibalibaran, gitumong ang
panglantaw ngadto sa pikas nga tampi nga angay
na gayod natong pagaadtoan...