11/15/2016

abi-abi

kon magtagad
ka pa

o nagtindog
ka pa diha
nagpaabot sa
motagbo kanimo


sayop ka
masamot ka gayod
kapraning

walay magpaabot
nimo
walay motagbo
walay
moabi-abi nimo
dinhing dapita

nag-iyahay
na diri sila ug
pangita sa kalipay

nagbudlay
sa pagpamunotunis
nagpaspas ug
hubo sa purol
giwagtang ang
mga bugkos
sa buhok
gilabay na ang
mga sapatos
ug bakos
giwakli ang mga
medyas
wala na ang
kurbata
ang barong tagalog
ang amerkana

dili lisod 
pangitaon ang
kalipay
sa mga dili na
kamaong
magpaabot
sa wala na
magdahom
anang
abi-abi

kinsa pang juan
tapuwan
ang magtagad aron
mahulog ang
hinog nga bayabas
sa iyang 
bulugan?

No comments :

Post a Comment

Lami ba?