3/11/2016

wala nay paryentehay

sulaton ko ang kabahin sa inyong
kausbanan
taposon ko usab kini kabahin namo

kaniadto usa ka semana kaming mosakay
sa Don Alfredo dala ang sinakong bugas
kamote, saging
lakip na ang tinaro nga kinupsang adobong
baboy
alang kaninyo

unya ang inyong kaayo usab inyong gipabati
nanuroy sa luneta
adtog baclaran kompra sa mga barato
simba sa quiapo

dako na ang kausaban karon
wala na kamoy panahon kanamo

kami usab nausob pod
wala na kami mibalik og nakighinabi kaninyo

naputol na ang mga kadena sa panag-ig-agaw
moingon ta nakab-ot na ang atong kagawasan

anaa pa ang kapula sa dugo nga naglataylatay
sa tong mga kaugatan
apan kusog kaayong milabay ang panahon unya
wala na kaayo nato maaninag ang atong mga 
dagway

No comments :

Post a Comment

Lami ba?