2016/03/24

pagsulat sa hwebes santo

dinhing lugara
ayaw kahiubos ha

akong kanunay madungog
mao ra jud ning mga tamsi nga
siging witiwiti

mingaw baya
pero kining mingaw kon maanad
ka
mahimong linaw

morag mabati mo ang imong hunahuna
hapsay, morag buhok nga gisudlay
kay kining sudlay dili baya sabaan
bisan ang buhok nimo gubot unya
morag alambre kagahi

madungog sab ang mga sugo ni manay
sa iyang sulugoon: silhiga ang mga sagbot
trapohi ang lamesa nga gikatulgan sa iro
didto ka manglung-ag sa dapog ayaw gamita
ang gasul
labhi unya ang mga trapo
magmap ka sa salog

ting-init sa mahal nga adlaw
hwebes, wala magpatukar og radyo
tingpugong karon

sa layo madungog mo ang talagsang tingog
sa mga motor nga milabay sa karsada
milabay sab ang mga bag-ong tubo nga
dili na mopatoo sa badlong sa ilang mga
tatay

magbasketbol sa gym dayon mangaligo sa 
dagat pagkahuman

kabahin nako, dulot gihapon ang kinaraan
puasa sa binignit og pila ka lugas nga pasayan og
paak sa kasag

dayon di kapugong, sulat sulat gihapon
naninguha nga unta ang akong isulat bahin sa 
bankaw, suka, kilid, dugo, mga sugarol nga nagpustaanay
sa sapot nga dili ilaha,

lansang, krus, bukid, dahunog, syagit sa mga namatyan,
bakho sa inahan, mapailobon nga anak
nga misangpit sa amahan,

eklipse, dayon, sa pipila ka gutlo, balik na pod ang
kahayag.

Panginhas dire