2016/03/13

balak sa ting-init

ang pagsalimuang
dili lang diha sa kakulangon

sa kagutom, sa dihang 
nakuyapan ka unya walay

mitabang, unya walay
nakakita, anaa usab kini

sa kahayahay, sa pag-awas,
diha sa mga nausik,

nagasalimuang ka sa imong
kahambog, samtang siya

nagsalimuang sa iyang 
walay pagsalig sa uban

bisan sa iyang kaugalingon,
bisan kang Bathala nga wala

sukad niya mailaila didto sa
suba nga naughan sa tubig.

taposon ko na unta apan
wala pa ang pagkilis sa 

kwadradong taksanan, oo,
salimuang kini sa pulong 

sa usa ka hilanat sa atong
panahon, kanang wala na

kita masayod kon unsa ang
buhaton, kon unsa ang sunod

kon unsa ang tua didto nga
angay kab-uton, usahay ingon

ana ang mahitabo, kanang dili
ka na kabalo kon unsaon 

paghuman ang nasugdan,
makasunog nga adlaw

makabungol nga bagotbot
sa mga balod sa dagat

tig-a nga mga bato 
taphaw nga mga balas 

mga pagpanghulog sa
dahon sa patay nga kahoy.

Panginhas dire