2016/12/05

kining akong mga kamot nabansay sa dugay nga panahon diha sa pagpanday sa kahilom sa mga lungon

natawo ako
sa kalibotan
sa pagpakahilom

matag adlaw
gikan pa kaniadto
anaa ang
kalibog
ang pagdaug-daog
atua sa akong
kan-anan ang mga
dili makaon
sa iro didto sa ilalom
sa lamesa
sa karaang balay
diin ang salog
dili makitkit sa
anay

ayaw ako
ug hagita nga molitok
sa pulong sa
kasilag diha kanimo

gani ang hilom nga
sapa
maabtan man usab
sa kisaw sa
baha

ayaw akog hagita
kay daghan na akong
nakat-onan diha
kanimo

moabot ra ang panahon
nga ang mga batong
gitagoan ni david
ilabay ra puhon balik
sa agtang ni
Golyat

kining akong mga
kamot
nabansay sa
dugay nga panahon
diha sa pagpanday
sa kahilom sa mga
lungon

Panginhas dire