12/17/2016

way mangilabot

gipakita mo na lang ang matuod
balayng hibat, kwarto sa kukok
nagpasad nga bulingon sa higdaanan
mga plato ug basong walay hugas
dili paris nga kutsara ug tinidor

kaniadto kon adunay moabot nga
bisita magdagandagan intawon siyag
alili sa mga kurtina, pasinaw sa salog
pahumot sa lawak, hapnig nga habol
limpyo nga alugnan, apan didto ra 
kadto kutob, karon na ang pasundayag

ang matuod ug matuod lamang ug 
wala nay lain kundi ang matuod lang
gayod: abir kinsay unang mopahawa
kinsay motigmi, kinsay mosyaok,
aning puntoha, kapoy na, way mangilabot.


No comments :

Post a Comment

Lami ba?