ang mando sa tanod ug dagom

gidebuho mo ang usa ka
buwak diha sa panapton nga
unya dapit imong sundon sa
tanod nga gitangag sa dagom

kon ang panapton aduna pay
pagbati sama nimo nan mora
kinig abaga nga gihimoan mog
usa ka buwak nga tattoo

hapdos, sahay modugo diha
sa galatagaw mong hunahuna
kay sa tinood lang wa ka
na gayod masayod kon unsa
pag ang himoon sa imong
kinabuhi,

lahi kining mga walay gibati
kay bisan unsaon og tusok tusik
sa dagom sama lang sa walay
nahitabo

nahimugso ang buwak nga
anindot nga natahi diha sa
panapton nga puti dayon
tungod lagi kay nahuman naman
ang pagborda imo dayon kining
gihipos, kay ugma sayong 
buntag imo kining lantawon 
pag-usab aron sa makausa 
pa ipasalig nimo sa imong kaugalingon
nga ikaw angayan pang mabuhi
nga ikaw usa ka tawong makamao
gihapon sa paglipay sumala sa
mando sa tanod ug dagom.