2016/04/07

ang abogado nga akong nasakpan nga mibasa ug balak

ikaw tong
abogado nga akong
nasakpan nga
nagbasa og balak

kaila ko sa maong
basahon
kaila ko sa maong
magbabalak
nga patay na
intawon

morag wala kas
imong kaugalingon

napildi kas kaso 
karon? o giaway kas

imong asawa nga
nakadungog bahin sa

imong bag-ong kabit o kaha
ba gilabanan mo ang

tinood nga nagpatay
unya karon gawasnon na

tungod sa kalantip sa
imong utok ug sa 
kahait sa imong hunahuna

nasamdan ang
walay labot: naa say
gamayng kahaw-ang

sayod ka niini, unya
morag nabati mo nga

ikaw migamay,
nagdaot, ug miabot

kini sa punto nga
morag di mo na kaila

ang imong kaugalingon
mismo, oo, mismo,

busa balikan ta
mibasa ka ug balak.

Panginhas dire