mga sugilanon

ang dagat karon
morag sanina nga seda
kadtong gigamit sa
kasal ni mama
nga gihipos ni lola
nga gisunod
sa iyang kamanghorang
apo nga
babaye

daghang sakayan ang
misubay sa 
kalinaw daghang
mangingisda ang milabay
sa ilang pukot

ang mga kanaway wala
sa langit
walay bisag usa ka tunob
ang nahibilin sa balas
nga sa kanunay gipapa sa
mga balod sa dagat

ang dakong iro nga puti
nahikatulog pa intawon
didto sa bugnaw nga balas
sa baybayon

nagpaabot ang batang lalaki
nga unta moabot na ang kusog
nga hangin
kay paluparon na niya ang
bag-ong tabanog nga hinimo
sa iyang tatay nga 
gipalayas na sa iyang
isog na nanay