2016/04/15

pamalandong...

angkona ang
katakus, nianang 
pagpili, pagpahat

mamul-ong ka,
mohagpat usab
dunay putlon 
dunay ilabay
dunay hiposon

adunay pulong nga
imong luwason
duna say imong
pasagdan, sama 

sa kalooy, sama sa
kaligdong, sama sa
kayabag ug sa
kabotboton, 

gihagpat mo ang
kamunggay
gipili mo ang 
tipasi aron ilabay
gipahat mo ang
gamay aron modako
aron ihatag puhon

giputol mo ang 
katas-on sa imong
pagpasabot
kay walay nahitabo
gihipos mo ang kahilom
giluwas mo ang 
kalinaw gipasagdan
mo ang pag-abot sa
kamatayon
kay unsa ba ang
imong mahimo?

kapila mo kaha
gipasagdan ang 
kayabag aron dili
siya masakitan?

kapila mo kaha
gigakos balik-balik
ang mga kabalaka
aron kini sa pipila
ka oras mawala
sama sa gabon 
didto sa kahayag
sa usa ka bag-o
nga nawong sa
kabuntagon?

Panginhas dire