2016/04/15

kabahin sa mga iro...

tungod kaha nga wala namo
kini makuha sa mga tawo
amo kining gisulayan ug kuha
diha sa among mga iro,

kabahin sa gugma, sa pag-amuma
sa pagsabot, sa kalipay, sa
pakigsandurot nga walay
lakbit ang mga pangutana kon
maayo ba kaha o hangtod kanus-a


ang akong asawa duol  sa mga
iro, gidulog, gihagwa, gihagkan
gigakos, gipapuyo sa iyang lawak
unya nakita nako nga siya nahimong
mas tawo kaysa mas iro

usahay makaingon ka nga sa
maong pagpila sa mga iro sa 
pakigsaundurot kanila nahimong
mas malipayon ang kinabuhi

namulak pag-ayo ang kalooy
migamot ang pagsabot
nanahon ang mga kalumo
unya sa hinay hinay nawala
ang mga pangutana kon ngano
nga angayan nga patas-an ang
kinabuhi sa tawo samtang
ang kinabuhi sa iro nagpabilin
diha sa kamabaw og sa kamubo

makita nimo ang kahulugan
niini. Mubo ra ang kinabuhi unya
bisag iro ka lamang adunay mas
bililhon sa imong pagkawalay
tingog, diha sa pagkiwil sa ikog,
diha sa pakigsandurot nga dili
ka maningil anang ilang
gikahidlawan nga kahangtoran.

Panginhas dire