mamalhin lang pod tang duha

wala nato kinahanglana
ang pakpak sa kabuntagon
aron madungog ang
atong mga kagabhion

saksi ang kaadlawon 
sa kahilom kita nga
nagtikawtikaw sa
wala pa ang kahayag

nangandam sa makabuta
nga kamatooran nga 
sa matag adlaw gibutang
sa kabuntagon diha sa
daplin sa atong hagdan

gisulayan natong papas
ang mga lama ang mga
mantsa sa atong mga 
pagbati, wala nawala.

giatubang ta ang tanan
nga walay pagbasol kay
kon unsa ang ania og 
atoa mao ra gayod kana

kon sa ilang tan-aw wala
kitay angayan nga idalit
sama sa gihapon mag-
tinan-away tang duha ug
sama sa gihapon andam
na usab kita sa pagbalhin
aron sa makausa pa 
ipahaluna na usab nato
ang atong mga kaugalingon.