2016/04/10

balak sa kasakit

ang tanang hulagway
sa gugma nga imong
gipakita sa kadaghanan
sukwahi man sa akong
nakita didto sa inyong
pantawan,

kunuhay gihalog ka sa imong
bana, naa siya sa likod,
nagpauraray ka, mipahiyom 
sa kilid sa bentana unya
dunay mibabay sa gawas sa
inyong balay nga nakaingon
nga basin daghang lamigas sa
inyong balay,

kaganiha nakita ka nakong
nag-inosara sa likod sa inyong
balay dapit didtos kusina
aslom man lagi ang imong pahiyom
morag suka nga tin-aw
unya ang imong bana tua durong
bunal sa imong paboritong iro
nga mipaak sa iyang iring nga
sa kataposan namatay

kaatik ko nimo,
maayo kang matago
sa imong kasakit
ug diha ko mibilib
ug samot nimo
bisan pa nianing tanan
nanambok man kag duro

hinoon, lami man kan-on
ang mga kasakit
dili na nato iglain ang
atong kaugalingong
kapait
ang kaaslom dili na sab
iglayo sa listahan sa
atong mga suod
nga kaila.

Panginhas dire