lumalabay

kinahanglan ba gayod
nga bulagon kita aron nimo
makita ang
akong kaayohan? 

kinahanglan ba gayod ang
akong pagpakahilom aron
nimo masuta nga
ako wala masayop?

ang akong balay nga
bag-ong gitukod didto sa
halayong bungtod
nanawag na kanako

ang kabaw nga akong bag-ong
pinalit nagpunay ug
labtik sa mga lagong diha
iyang ikog

ang antulihaw namatyan sa iyang
paris ug nangandoy nga
akong putlan ang hikot sa
iyang tiilan

ang bangaw nindot man ugaling
apan sayod ka
nga kadyot lang kini
sa atong panan-aw

ug sama sa taliabot bahin
kanato kini usab
morag tagolilong nga mawala
lang dayon