ang bayad

wala nay libre karon

no such thing as a free meal

you have to pay the price for

whatever,

kon aduna may libre
basin utot, basin buwak sa
utot-utot

aduna ka gayoy bayran
sama anang pagpakasala
dili na libre
bayaran mo gayod

adunay bayad ang tanan

sama sa usa ka maanindot nga
balak nga akong nasulat
gibayran ko kana

pila ka gabii nga wala na akoy
tulog?
ug pila na usab ka gabii nga
ikaw naghinuklog?
wala nako matangtang ang akong
kasakit diha sa mga pulong
ug sama sab nimo
mitapot ka sama sa usa ka langaw
diha sa tagok
sa wala pagbatok sa angayang
batokan,

adunay bayad ang tanan

bayad sa utang kabubut-on
bayad sa kagahapon
bayad sa imong gipaabot
bayad sa karon

kagabii gibayran ko ikaw
gidawat mo unya imo usab kining
gibayad kaniya

ang mga kasakit ug kalipay
nagbalhin balhin ug sudlanan
dughan sa dughan
kamot sa kamot
tiil sa tiil

ang mga pagbati nanagtagkos
nabaliktos, nanagsabod, nagalingkis,
usahay gusto natong hubaron
limpyohon, apan lisod na pangitaon
ang sinugdanan ug ang kataposan
maong moingon ta,
paaboton na lang nato ang dangatan
tagdon na lang nato ang nilugdangan

asa ba gayod kutob? kanus-a ba ang
pagkakulob? asa ang pagkayang?
asa isampak ug asa ang paglangkat?

bayad sa utang, bayad sa kaliwat,
bayad sa bayad, walay bahandi.