mahitungod sa mga takuban ni A.

pagsulod ko sa imong
lawak
didto nako nakita ang
daghan mong
takuban

usa niini mao ang
katawa
diin ikaw nailhan nila
gani sa tibuok
mang kalibotan

kami nga usa ray
nawong
gikan sa pagkatawo
hangtod sa among
pagkamatay
wala na malipay 
kanimo

mihangyo ka nga
unta kab-otan namo
ang bisag gamay lang
nga pagsabot

bisag usa lang ka pignit
nga kaasgad
bisag usa lang ka tapi
sa katam-is
diha sa katarungan nga
kon wala pa kadto
mahimong dugay ra
ikaw nga giagiw sa
dakong sunog sa 
kamingaw

ang panahon ug ang 
kalagyo
dili na makahaklop sa
atong kalainan

bisan gani ang pagtug-an
mo kabahin niini
diha sa usa ka pagkumpisal
wala na makahupay sa
among kasakit

mangalimyon ang pag-ilad
apan dili humot
nalugmok na ang kalibotan
sa kadaghan niini
sa inyong mga katarungan
nga ang kinabuhi
ingon gayod niani

managlahi na ang atong
kalibotan
ikaw diha kuyog sa mga
tuko nga tag-iyahan sa
mga bulok sa
bangaw
nga maayong moabi-abi
sa kausaban sa panahon
sa pagkilingkiling sa 
mga pangagho
sa pagsubli sa kadaotan.