9/10/2016

ang mga maanindot....

gihipos mo lang kini
pila na ba ka tuig ang milabay?

nakita mo kini sa pagkahulog sa
dahon sa acacia usa ka hapon niana
didto sa kilid sa simbahan
sa magsaysay

nadungog mo kini sa teleng teleng
sa mamaligyaay ug pan sayong buntag
nga nagsuroy didto sa imong
balay sa sta felomina

nabati mo kini sa dihang gidap-ig
niya ang iyang ulo diha sa imong abaga
sa dughan
samtang nagsakay kamo sa rural transit
niadtong sayong kaadlawon
paingon sa zamboanga

kining kaanindot, kining kaanyag
kining mga laming lamas sa kinabuhi
nga bisan unsaon nimog 
panugilon
molingiw lamang sila
sa dili pagtoo nga mora bag kining
mga ingon ani
angayan mo lang hiposon
kay sa laing bahin
nawad-an na sila sa mga panghitabong
sama niani

atubang sa gubat sa kahadlok 
sa pagbakwit
sa pagtago
sa pagpunay ug hunahuna kon unsa
na pod
ang sunod mahitabo ugma...

No comments :

Post a Comment

Lami ba?