pangaliya sa usa ka kamatayon

ang gipatay didto sa gawas sa atong
balay
niadtong buntaga wala kaayo nato 
gibati ang kahingawa
nganong sa iyang kamatayon ang
iyang asawa ra ang miiyak
ang nangayog pakitabang nga bisan
sa kadaghan sa naglantaw
nakadungog
gani nag-alirong man human sa dakong
lanog nga buto sa kamatayon
wala man gayoy bisag usa nga mitabang
o mitawag man lang sa ambulansya
o pulis
o bisan man gani sa paghawan sa 
dalan aron makagawas ang hingtundan
aron dalhon sa hospital

walay bisag usa nga nangilabot
o nakaila o miangkon nga siya kaila o
paryente sa gipatay

kon ngano kaha wala na akoy katungod
pagsulti kanimo bahin niana

ikaw nga atua sa layong dapit nga nakabasa
o nakadungog niini moingon nga kami mga luog
sama sa nagpatay
nga kami wala na nagbaton sa maayong pamatasan
sa pagtabang sa nagtinga
nga kami kaha mga patay na usab
sulod sa nitso sa among panahon karon

kinsa ka ba nga mohusga kanamo bahin niana?
kon ngano nga ako mangutana usab kanimo bahin
niini, pasayloa, apan wala ka usay katungod 
sa paghukom kanamo

samdan ang among kasingkasing
gani wala pa man kini maalim
nagdugo pa man gani kini hangtod karon
wala ka dinhi, layo ka kanamo,
init kaayo ka nga adlaw sa among dakong kahulaw.