diha sa pagsul-ob sa imong sapatos

kung akong isul-ob ang 
imong sapatos
magsakit gayod ang akong
tiil
morag dako ra kaayo ang akong
lapalapa

maglisod ko ug lakaw
basin pa gani matapisod ko
basin gani mabakang ko
unya kataw-an dayon ko nila
basin gani maguba ang maong
sapatos

basin gani masuko ka na hinoon
nganong ako kining gihilabtan
nga unta kini anaa man lang sa
ilalom sa katre nagmalinawon

apan bisan pag unsay dangatan
sulayan gayod nako ug sul-ob ang 
imong sapatos
gipangita lang gayod nako ang
naa sa sulod aron ako kang mabati
aron ako kang masabtan

gani ako mang gipangita ang
parte diin ako masakitan usab
aron makumbinsi nako ang akong
kasingkasing nga unta ako ka
na lang gayod nga hikalimtan...