2016/09/06

ang mga agulo sa kalipay

mahimong ang mga pulong
lit-ag
aron dakpon kadtong midagit
kanato unya dili kaayo
nato maila-ila

kadtong dili man god nato mailhan
mao may makahatag kanatog 
kalisang, 

kon ato man god kunong manganlan
ato na kining madakpan
mahikot nga sama sa usa ka layaw nga
iro nga ato na nga gigaid sa haligi
sa balay aron atong lawgan
aron atong amigohon hangtod nga
mokiwil na ang iyang ikog hangtod nga
kita na ang iyang ilhon nga
agalon

ako kang ilhon, kon wala ka pay ngalan
ako kang nganlan
dugay na kaayo ang panahon nga kita wala
mag-ila
bisan pa ug nagkuyog kita 
bisan pa ug nagdulog kita nga morag
magtiayon

ang paglit-ag anaa sa kagabhion
ang hikot nako mao ang pulong
ang atong panaghigala mao na dayon
ang kalinaw

ang mga adlaw ug gabii usa na dayon
ka pista sa balangay
mosayaw ang mga babaye 
mopakpak ang mga lalake
unya pagkahuman mag-iyahay silag
dala sa gugma paingon sa
ilang tagsa tagsa ka mga lawak

dayon ang imong madungog mao ang
agulo sa kalipay nga abi mo ug kinsa ang
gipatay
apan wala diay

Panginhas dire