halad pasalamat

unta migawas ka na
sa balay
hanggab sa bugnaw
nga hangin sa kabuntagon
lakaw-lakaw
suroy-suroy lantaw sa mga
buwak, kakahoyan, mga balay,
mga panganod,
mga kaumahan, atua ang
kabaw nga gatuna,
ang mga maya, ang tulabong,
nindot kaayo ang makita
nimo diha sa usa ka lakat
sa imong panahon 
karon,

apan anaa ikaw sulod
sa imong lawak
nanghagpat sa mga pulong
nga morag dahon 
sa kamunggay
nagpili sa mga tipase
sa imong kinabuhi
samtang nagdagan ang
mga oras
hangtod nga mitunol na
kini sa kahayag
diha sa imong bentana

unya anaa lang gihapon
ang pasalamat
sa dihang nahuman na usab
ang laing balak

kadtong nasuko nganong
wala ka pa
katak-ang sa nilung-ag
wala masayod sa imong
mga kasakit.