2016/09/04

pag-amoma

ang irong gikato
lisod nimong tambalan kon
imo na ganing duolon
magdagandagan

unsaon mo kaha pagpasabot
sa bata nga 
managhan iyang lungag
sa katam-is sa 
tsokolate?

dili na ko ganahan mamati
anang mga katawa ug pasiaw
sakit na sa dunggan labi na
nga ang kagubot naghatag og
daghang mga   patay didto
sa unahan

morag ulo sa iwon nga
nag-ung-ong ang laing mga
kasamok

ug ngano pod kaha nga dili
man gayod magkasinabot?

gibati kog kalooy unta sa akong
mga pag-umangkon nga 
atua layaw, lagaw, nagpalami
sa ilang kinabuhi
apan unsaon man kaha nila
pagkat-on kon dili silang tanan
mahiagom sa kasakitan
diha sa kapakyas labi na unya
sa di mapugngan nga
kamatayon  ?

sakto ka
 ania ang kinabuhi sulod
sa lawak

ikaw nag-inosara, nagsulat,
nagmatngon, nanaghap, milantaw
sa unahan
 
kon adunay moabot nga mga unos
dili ka matingala
kon adunay mamatay dili ka na moiyak
kon adunay kaslon dili ka na usab
mopakpak
kon adunay laing bata 
nga ihimugso sa kalibotan
dili ka na usab ganahang moduyog
sa kalipay sa iyang 
amahan ug inahan

dili ka na gani mohagwa sa
kumagko sa pahiyom sa
usa ka puya 

gitak-om na  ang imong baba
gihaw-asan mo na ang imong dughan
ang mga bato gipanglabay na sa 
dagat
ang mga buwak wala na gikutlo
ang mga manok gipasagdan na lamang
sa kasagbotan
mangitlog man o atayon
wala ka nay labot
niining tanan
hangpon man ugaling ang
mga umaabot
apan kini 
pagrespeto na lamang 

Panginhas dire