tabiraw

ang kabayong puti ni Tatay
patay na.

pagkadaghan pa unta sa atong
nakuha nga kumpay.

si Tatay ang unang namatay
dayon ang iyang kabayong puti

nga ato untang pagasakaysakayan
apan ang kabayong puti patay na

ang nakakita miingon nga napaakan
kini sa usa ka itom nga halas,

unya sa kalit human sa pagpaak ug
sa dihang namatay na ang kabayong 

puti, nawala usab kini dayon, samtang
ang tikaron nga asul, mipatong sa sanga

sa nangka, naglutok, nangandoy sa sapa
diin ang abo nga isda, kanunayng nagduka

pagkadaghan pa unta sa kumpay nga
atong nakuha sa daplin sa sapa apan

ang kabayong puti patay na, apan ang
itom nga halas kalit lang usab nga nawala.