7/19/2016

ang mga bakak

dili tanang gaaron-aron
daotan
naa sab silay mga katarungan
sama ra usab sa mga higala
tang bakakon

kahibawo tas mapa sa ilang
mga panaw
sayod ta nga sila mipasilong
lang tungod kay kusog
ra kaayo ang ulan

mipahipi dapit sa landong sa
ngiob nga langob tungod kay
makasamad na kaayo ang miabot
nga kahayag

sakit ra kaayo ang kamatooran
daghan na ang naghikog kabahin 
niini
dunay miambak sa pangpang
dunay naglumos sa lawod
dunay naghikot sa ilang liog
kay hapdos ra kaayo ang hangin
nga misulod sa ilang baga
kay asgad ra kaayo ang gihatod
sa ilang kasingkasing

pasalamat ka nga sila nagpakabuhi
kuyog kanimo
kon may kalooy ka pa
ayaw na lang unta ambata

sa daplin sa bungtod 
diin bugnaw na kaayo ang kagabhion
magdaob kita aron 
mabati ang kainit
sugnuran ta ang bakak sa laing bakak

makalipay kini
makaayo
bisan ning gabhiona lamang
gani ang kangitngit mitabang
man
aron maanindot ang mga bitoon
aron mahimong yano ang kalibotan
aron mahikatulog ang mga
gasalimuang
bisan kadyot man lamang...

No comments :

Post a Comment

Lami ba?