2016/07/13

walay tingog

pagkadaghan sa
nabuhat nga dili gayod
nato ikapanugilon,

naa may maayo
kadtong mga nakapaiyak
kanato sa kahingangha
apan mas daghan ang
mga daotan, nga sama
sa mga maayo
nakapaiyak gihapon nato
sa samang kahingangha
tugbang lang
walay sobra walay kulang

maong nakapangutana ta
dili kaha kining duha
pareho ra?

ang adlaw miabot
nga walay tingog
sama usab sa bulan
wala gihapoy 
tingog

ang kagabhion mibiya
ang kabuntagon miabot
walay tingog-tingog

ang salamin milantaw 
kanako
walay tingog

ang lawak ang higdaanan
ang mga lingkoranan
nga hubo
walay tingog

hilom ang akong kalibotan
samtang ang mga pulong
naglaray, dunay uban mitampisaw
sa akong kahilom
wala gihapoy mga tingog

bisan gani kon misyagit
nangaligo na
silang tanan diha sa lapyahan
sa mga dahon
wala gihapoy tingog....

Panginhas dire