2016/07/21

ang kabag-ohan

dunay lawak nga
gibalikan ta kagabii lamang
ang una nimong pangutana
kon nausab na ba ako

gibalik nako ang kanhiang
pahiyom
ang tingog nga pagawon
ang talidhay sa akong
karaang hagawhaw

sa usa ka gamay nga 
paghandom
mibuhakhak kog katawa
unya miingon ka
ako pa gayod diay kadtong
kanhiay mong kauban
sa maong lawak
nga atong gibalikan
kagabii lamang

sa tinood daghan nang
kausaban
apan ako kining gitago
ikaw mismo 
nausab na usab
migimaw na pag-ayo ang
puti nga buhok
ang kunot sa agtang
ang luag nga bukton
ang hupyak nga aping
ang tingog nga
mas mingaw

laing baso sa laing bino
laing tabon sa laing lamesa
laing panahon sa kasingkasing

human ning gabhiona
mopauli na ako sa laing balay
kay abi mo
aron motaas pa gayod ang
akong kinabuhi
gikinahanglan sa akong panahon
ang mga kalainan

mahimong dili na ako ang ako
kaniadto
mahimong dili na gani ako
mas malipayon pa
apan lahi ang bag-o sa daan
magmata ang utok
moabtik ang mga kamot
madungog nako ang kisaw
sa mga isda
didto sa sapa sa akong
kalag

Panginhas dire