2016/07/13

balaanon

wala koy gibadlong
sa mga badlongon, ingon ko
sabton ko kamong tanan
basin kulang lang kamo
sa pagmahal
kaniadto pa, ingon ko, dili
ko usab kamo pasagdan,
kon adunay daotan ako kining
ayohon, kon adunay uga,
o kaha ba kagiron nga
mga realidad, ako kining
kaligoon sa akong mga halok,
akong lugdan sa akong
pagpangga, ingon ko
madutlan ang bisag unsang
tig-a sa gugma, walay gahi nga
pan sa init nga kape,
walay bato nga dili mahilis sa
tulo sa ulan, sa pipila ka katuigan,
ingon ko, dili na ako mangutana
kabahin sa kaniadto, balewala na
kanako ang karaang panghitabo,
ingon ko ang karon, ang karon
mao ang bililhon, kon kinsa man
ang natikalbong, atong 
patindogon pag-usab,
kon kinsa man ang dili na
ganahang mabuhi, o kinsa man
kadtong patay na, ingon ko,
atong banhawon, ingon ko
kita magpakaDyos, 
sa ilang mga tiil,
kita manghugas.....

bahala na og dili sila motuo.

Panginhas dire