2016/07/17

unta gitabangan mo ako sa paghikalimot

gilantaw ko pagbalik
ang akong kagahapon
usa ka hapon niana
samtang gahinayhinay
ug kahilis ang kahayag
nga hinatag sa
adlaw, 

dunay makalipay,
daghang makaguol
labi na kadtong usa
ka higayon sa akong
dakong kaulaw

nakita mo ako, wala
na akoy mahimo
apan maayo akong
molimod, molimot,

kadtong butanga nga
gusto nakong ilubong
nga gayod sa hingpit
nga kalimot

apan kon magkita kita
pagbalik
sa usa ka panahon nga
dili na nato
malikayan

ako kining atubangon
pagbalik
magpakaisog ako 
sa paglitok usab sa
ngalan, sa lugar,
sa oras,
banhawon ko pag-usab
ang mga agulo
sa kagabhion

kon imo akong kataw-an
o basin tulisokon bahin
niini
wala na akoy mahimo
gakson ko na usab kadto

magpakaisog ako sa
pagpasalamat kanimo
litokon ko pag-usab
ang mga pulong:
daghan akong nakat-onan
unya dili ko na kadto
sa makausa pa balikan....

Panginhas dire