7/22/2016

unsa kuno ang imong gibalikan?

nangutana ang tigulang nga babaye
nga naglubo sa mais sa dihang miabot
ka sa ilang bukiran

layo kini
usa ka adlaw nga nilakaw
tungod lagi kay wala may
habalhabal nga
moandar

gamay nga payag
ang kusina ang higdaanan
ang tanantanan
usa ra

unsa kuno ang imong gibalikan?

sa unahan atua ang lubong
nga dili kaayo lalom
nga wala na manimaho sa kadugay
sa panahon

dunay buwak ang imong mga kamot
nga gibuswak sa init nga panahon
ang pagduaw mao ang  paghalad
unya ang pagbiya sa oran-oran
mao ang pagkalaya

No comments :

Post a Comment

Lami ba?