7/21/2016

ang mga bisita sa adlawan ni meggie didto sa bambo garden

unang miabot ang gaantipara
nga dili gyod mapanghimakak sa
panahon nato karon

besobeso, agik-ik, kaduha gyod
mitindog aron mogakos
dayon milingkod
daghang mga pangutana
nga gitubag ra pod sa mga
ginagmayng bakak

gwapo lang gihapon si ian
kuyog ang gwapong batan-on
nga iya kunong pag-umangkon,
(gihungihong baya nga
didto sa canada napugos gayod
intawon ug dawat ug labada,
apan dili kana maoy akong punto,
harapharapang gipangutana
sa among amigang tomboy nga
dugay na ba kuno sila
sa iyang kuyog nga kulungon ug
buhok unya tisoyon)

dili gayod kapugngan ang 
pagpamantay
labi na kon dugay na kaayo
nga wala magkita
kay ug sila pa
kon nagsubo ka 
mawala kini dyotay kon
ang kasubo sa uban
imong mabantayan

(misery seeks misery,
ours shall be lessened by theirs,
mihirit ang mangkay nga
maestra)

birthday man god ni meggie
ika 70, diabetic, nag insulin na
dayon ang iyang bana
samtang didto siya sa chicago
nagpabuyag
kay lagi ang ilang maid nga
suban-on iya man sang gikalingawan
busa intawon ang iyang
mga mahalon nga plato
tinidor ug kutsara
nangawala na  intawon
sa ilang butanganan

human sa kaon kaon
duna gagmayng dayegdayeg
speech, speech,

mipadayag ang iyang
anak nga maestra bahin sa
kaagi sa iyang mama ug sa iyaha
(milanog ang tsismis nga
si meggie jr. natomboy na man
sa arizona, 
bulag sa iyang bana
gidala ang anak nga
karon morag natanga na
ug mitipon sa iyang
karaang uyab nga babaye
nga karon
nakatrabaho na usab
sa arizona
ingon si judy init kuno
kaayo sa arizona,
makit-an ang rabbit nga
patay silong
sa cactus didtong
dapita


ang igsoon ni meggie
nga gidungog nga kurakot nga
mi retire isip regional director
sa DENR
midapadayag usab sa iyang
gibati
pagdayeg sa iyang igsoon
nga kuno sa batan-on pa
morag kaputi ni snow white
nga mora bag kachika niya si
snow white sa ilang panahon

unya si meggie kuno bisan
pas kalihok ni gregor nga iyang bana
nagpabilin nga mapailobon
(apan tungod kini nga si gregor
sapian nga kon biyaan ni meggie,
unsaon na lang kaha
pagpalit ang mga kapritso
sa usa ka snow white
didtos wonderland?)

si felipe nabyudo na pod diay
maong ang kuyog sa party lain
na, apan tiguwang na usab ug nawong
nga sama niya
namatay daw ang iyang anak
sa batan-on pa
tungod sa kidney,


tomboy lang gihapon si bebe
kusog gihapon manigarilyo ug marlboro
maoy iyang brand gikan pa kaniadto
maong baho lang gihapon
ug baba, unya kada birthday party
siya gayod ang mapangitaan ug
lighter pangdagkot sa 
birthday candles

daghan ug kabuang ang tawo
nga para kaniya makalipay
nga para kaniya bahala na mog
unsay inyong yawyaw
apan ang importante nga ang kalipay
magpabilin

walay keber, wala nay pangilabot
manhid, baga na ug nawong,
naanad na sa libak, hangtod nga
ang mga manglibakay naapil na
sab sa kamanhid, unya ang mga
namati, mas nakasabot nga nga
kining tanan, ilapos ra pod diay
sa pikas dalunggan.

ako sab sa akong bahin, mo pretend
nga sama ra gihapon ang kaniadto sa 
karon
apan sa tinood lang, daghan na akog
giusob sa akong kinabuhi
gigakos ko ang mga maayo
gihagkan ko ang mga bililhon
ug sa hinay hinay gipanglabay na
nako ang mga nakadaot kanako
apan sa hunahuna nga ako
makalipay lang gihapon kanila
akong gipakita ang wala nila
gipangita; ang tabon sa lamesa
ang mga naandan nga tumbanan,
ang mga gabon sa bungtod,
ang mga bato sa agianan.

No comments :

Post a Comment

Lami ba?