pagpili

sa dihang mihigda ka na
sa imong katre
didto sulod sa imong lawak
ang kisame
misugod paghatag kanimo
sa usa ka sine-sine

ang mga gagmayng  mga anghel
nga gamaya
mikapakapa sa ilang mga
pako
libot sa bombilya

nawala ang kahayag
mibanos ang lapad ug lalom kaayong
kangitngit unya sa  hinay
hinay miabot ang mga bitoon
sa tumang kahilom

karon sugdan na usab ang bag-o
nimong panaw
diha sa katulugon

ang mga karwahe sa damgo
nagpaabot kanimo
mopili ka 
itom ba o puti nga kabayo?