4/20/2015

gugma og kaulag

kon ang kasingkasing
maglangi
abi niya og ulitawo ka pa
abi niya og 
mao pay pagtubo sa imong
bugasbugas
abi niya og kusgan ang imong
mga bukton,

kon kaulag ang mangayo
abi niya og baga pa ang imong
bulsa
abi niya og pwede pa nimong
utangan ang laing
kaugmaon,

sahay balibaran mo 
unya dili silang duha makatoo
abi nilag di ka kamaong moiyak
sulod sa lawak
maligo sa banyo
unya manabon 
hugasan pag-ayo ang 
gaaso nga kainit 
sa imong lawas

kon silang duha magdungan
og panguhit nimo
pangayo na daan og pasaylo
sa Ginoo

ang edukasyon ilabay sa bentana
ang kahait sa hunahuna 
nahimong habol nga sundang
hunahunaa nga kadtong pusil nga
imong gitago
kamaong magpaboto sa iyang
kaugalingon gatilyo

kay kinsa ba ang halangdon 
og hari kabahin aning mga butanga?
kinsang baha kaha ang mapugngan?
kinsang ranchero kaha ang makapugong
sa mga toro
og sa mga kinoral nga kabayo?

No comments :

Post a Comment

Lami ba?