tagna

lahi na man lagi ang imong mga pangutana sama sa:

nganong maghimo pa man og labat? 
nganong nagbalay pa man kana siya?
kinahanglan ba gayod ang atop og salog?
o bisan salog na lang? mahimong mapasaylo
pa ang pagtaod sa atop, apan nganong
babagan pa ang mga lapalapa sa panit sa
kalibotan?
nganong mipalait ka pa man og laing
sapatos? kinhanglan mo pa ba ang dugang
nga kutsara? di ba god mas nanam ang pagkaon
kon kita magkinamot?
unsaon mo pa man ang bag-ong kanta?
wa pa man gani nimo naawit ang atong
karaang kansyon didtos Galas?

galangan-langan na lang ang laing sapatos
ning atong panaw
og wala na usay kagamitan ang miabot
nga sakayan

kinhanglan pa ba gayod nimo ang laing
katuigan?
wa ka pa ba nasumhi ning imong gihandom
nga usa ka bukag nga kaguol?

pagkabuang nianang tawong nagpaabot
sa moabot nga barko,
pagkahuyang pa nianang namula og nawong
og kaiyakon
pagkatorpe anang lalaking nagpaibog pa gihapon
sa iyang bagtak sa babayeng puwa og aping

natikwang na ang kalibotan, kuhit na lang sa
bonhok ang kuwang
mangabuak na ang tanan, suyupon sa dakong
baba sa bakunawa
unya ang mga mata magkabuang og pangita
kon asa na kitang dapita
unya ang atong mga tiil wala nay tumbanan
ang atong panit wala nay mabati

og kadtong nagtindog nga wala nay gihangyo
mao ang pinakabulahan