handuraw

kaniadto
miiyak ang puthaw nga katre
bisan unsaon
niyag iyak
walay luha nga moagas
kay lagi
bisan unsaon pa niyag
pamakak
nagpabalin siya gihapong

puthaw nga katre

sa paglabay ba panahon
gipatay siya sa iyang kaugalingong
taya,

kita naghimo og milagro didto
sa gahing puthaw bugtong testigo
sa atong pagkaundan
og buot

pagbati lamang ang akong 
gibasehan
og kon pagbati ang sukod
sa kalipay
milapas kini ngadto sa
hagdanan

gibalikan ko ang puthaw nga
katre nga namatay sa iyang kaugalingong
taya
walay tugon
kabahin kanato

ambot kon sama kanako gihinumduman mo
pa ba kadto

sa akong lantaw mikatawa ka lang
kay pagkahuman niadto naglatagaw ka man

wala sa imong buot
walay unod walay bukog
kadtong lawasa

wala pa ako makabako sa akong piang
kanunayng hiwi ang akong bitiis
dili pa gihapon kalikayan nga usahay
ako magkaangkaang
sa akong kiang

salamat. pasensya na.
kon ikaw lang gihapon ang akong
makita sa gapnod

katawa lang.
unsa ba goy bili sa usa ka salimuang
unsa bay kaanindot anang mga hiwi,
balikog, sangkong, 
og mga pondol og habol?

kon mahimo unta
bairon ko pag-usab ang panumduman
aron kini mahait
modulot pag-usab
bisan ako masamdan.