mga ulipon

ang kanunayng
magsunod-sunod kanimo
bisan asa ka

anino

kanunayng uhaw sa
kahayag diha sa iyang likod
nga mao ra usa'y
mahimo niyang 
agalon

mga tunob

gipangita ang kahumok sa
balas
ang tubig diha sa lapokan
gikahadlokan ang
mga dila sa 
balod

ikatulong ulipon
mao ikaw

ulipon ka sa imong hunahuna
sa imong pulong
apan mas labaw sa kapritso sa
imong kasingkasing
sa kaluag kahugot sa imong
karsones

ulipon ka sa gisulti sa uban
sa mga mugna ning lumalabay nga
panahon

kon unsa man ugaling ang kaulahian
ikaw, og ikaw lamang
gayod ang 
mabasol