2015/04/11

unsaon mo paghimo og gamot ning kalibotan ta

gibalikan ang mga ginagmayng tuyo
sa kinabuhi
mangutana, kon ang boganbilya 
nabuboan na ba? pagkalooy sab og
mamatay na kini karong Mayo,
tingpamulak na man unta, kon ang
mga iro, nga maoy tigbantay kanato
magabii, napalitan na ba sa ilang 
paboritong dinuguan gikan sa
karenderia ni elma, kon ang 
suga sa likod sa kusina napalong
na ba kaha, kon ang mga sayaw-sayaw
nasaburan na bas ilang patuktok,
kon ang pangadlaw gidugangan ba
usab ug bunot aron kini molabong,
kon ang mga bebe nabutangan na
ba ang ilang palanggana og tubig
aron sab sila makatilaw og basa
sa tubig,

mga ginagmayng tubag aron dili
kita mawala sa atong mga katuyoan
kay og wala na kining mga butanga
asa kaha kita paingon?

daghan nang miambak sa tulay
sa Opon
sa wala pagtubag niining mga
ginagmayng pangutana.

ayaw kana kalimti.

Panginhas dire