tinuyuang kamingaw

matag tawo naghimo og
badlis

usa ka tuldok nga imong gikariling
balik sa iyang unang tunob
sama sa usa ka prusisyon nga kanunayng
mobalik sa ganghaan sa simbahan
sama sa imong pagkabata nga kanunay
mobalik sa imong dulaan

ang nakapareho niining tanan mao
ang pagpanirado

og diha sa maong buluhaton
adunay imong ibutang sa gawas og sa sulod

usahay sa imong pagkapiliin ang imong kaugalingon
ra ang imong masirad-an dayon nimog basol sa
kalangitan nganong ikaw nagmingaw man nianang
imong gihimong kalibotan

pastilan baya! ang mong sala sa kalaog mora mag
tae nga nanimaho nga karon gusto nimong ipahid sa
ubang agtang!